Pwyllgor Cymunedau, Cydraddoldeb a Llywodraeth Leol

CELG(4)-06-11 : Papur 3

Papur tystiolaeth –  Cyllideb Dwristiaeth Ddrafft Llywodraeth Cymru 2012/13

Cyflwyniad

1. Mae’r papur hwn yn rhoi gwybodaeth ariannol gefndirol i’r Pwyllgor Cymunedau, Cydraddoldeb a Llywodraeth Leol ynghylch cynlluniau gwariant yr Adran Busnes, Menter, Technoleg a Gwyddoniaeth ar gyfer Twristiaeth a Digwyddiadau Mawr, fel yr amlinellir yn y gyllideb ddrafft a gyhoeddwyd ar 4 Hydref 2011.

Crynodeb o Newidiadau’r Gyllideb

2. Mae cynigion y gyllideb ddrafft ar gyfer Twristiaeth a Digwyddiadau Mawr wedi’u llunio yng nghyd-destun gostyngiad yn y llinellau sylfaen yn dilyn setliad yr Adolygiad Cynhwysfawr o Wariant. Mae crynodeb yn Atodiad A o’r prif feysydd gwariant ym Maes y Rhaglen Wariant. Yn gyffredinol mae’r gyllideb Twristiaeth a Digwyddiadau Mawr wedi gostwng £0.279m, sef gostyngiad o 1.4% yn erbyn llinell sylfaen 2011/12.

Twristiaeth a Digwyddiadau Mawr

Cam Gweithredu	Categori Gwariant	Cyllideb Atodol 2011/12 £’000	Newidiadau	Cyllideb Arfaethedig 2012/13 £’000	Cynlluniau Dangosol 2013/14 £’000	Cynlluniau Dangosol 2014/15 £’000
Twristiaeth a Digwyddiadau Mawr	Refeniw	16,677	84	16,593	16,523	16,523
	Cyfalaf	2,790	195	2,595	2,313	2,313
	CYFANSWM	19,467	279	19,118	18,836	18,836

Twristiaeth

Cam Gweithredu	Categori Gwariant	2011/12 Cyllideb Atodol £’000	Cyllideb Arfaethedig 2012/13 £’000	Cynlluniau Dangosol 2013/14 £’000	Cynlluniau Dangosol 2014/15 £’000
Twristiaeth	Refeniw	12,747	12,723	12,626	12,626
	Cyfalaf	2,790	2,595	2,313	2,313
	CYFANSWM	15,537	15,318	14,939	14,939

3. Bydd cyllid o £15.3m ar gyfer gweithgareddau twristiaeth yn canolbwyntio ar gynyddu galw a throsi ymwelwyr, datblygu profiad ymwelwyr a hwyluso ymgyrchoedd marchnata perthnasol. Mae’r gostyngiad o £0.219m yn sgil arbedion effeithlonrwydd mewn gweithgarwch twristiaeth.

4. Mae’r gostyngiad cyffredinol o £0.219m yn sgil arbedion effeithlonrwydd o £0.416m i ddatblygu profiad ymwelwyr, sy’n cael ei wrthbwyso gan gynnydd o £0.197m i fynd i’r afael â’r pwysau galw a throsi.

5. Y flaenoriaeth i dwristiaeth yw gweithio gyda phartneriaid y sector cyhoeddus a phreifat i ddatblygu economi ymwelwyr cynaliadwy. Bydd gweinyddu’r Cynllun Cymorth Buddsoddi mewn Twristiaeth a chynlluniau graddio cydlynus y DU yn effeithiol yn helpu i wella ansawdd cynhyrchion a gwneud y sector twristiaeth yn  fwy cystadleuol.

6. Bydd twristiaeth yn cyfrannu at sawl ymrwymiad. Bydd camau gweithredu’n datblygu gweithgarwch twristiaeth a marchnadoedd arbenigol, ac yn manteisio i’r eithaf ar ddigwyddiadau mawr yn ein lleoliadau proffil uchel ac yn hyrwyddo Cymru fel cyrchfan dwristiaeth o safon uchel. Bydd y gyllideb yn cefnogi ymestyn y tymor ymwelwyr a’r manteision cysylltiedig, yn ogystal â nodi cyfleoedd cyllid i wella’r seilwaith a’r cynhyrchion i ymwelwyr yng Nghymru.  Bydd cymorth cysylltiedig ar gyfer buddsoddi mewn hyfforddi a rheoli staff i gefnogi diwydiant o safon uchel hefyd yn bwysig.

Digwyddiadau Mawr

Cam Gweithredu	Categori Gwariant	Cyllideb Atodol 2011/12 £’000	Cyllideb Arfaethedig 2012/13 £’000	Cynlluniau Dangosol 2013/14 £’000	Cynlluniau Dangosol 2014/15 £’000
Digwyddiadau Mawr	Refeniw	3,930	3,870	3,897	3,897
	CYFANSWM	3,930	3,870	3,897	3,897

7. Bydd cyllid o £3.9m ar gyfer Digwyddiadau Mawr yn cefnogi gwaith gyda ffederasiynau chwaraeon cenedlaethol, y DU a rhyngwladol i sicrhau bod Cymru’n cynnal mwy o ddigwyddiadau mawr yn y dyfodol, gan sicrhau bod Cymru gyfan yn gweld manteision yr uchelgais hon. Bydd y gyllideb hefyd yn cefnogi gwaith gyda Chyngor Caerdydd i ymchwilio i ymarferoldeb gwneud cais i gynnal Gemau’r Gymanwlad yn 2026.

8. Mae’r gostyngiad o £0.060m yn sgil arbedion effeithlonrwydd.

9. Bydd y cyllid ar gyfer Digwyddiadau Mawr yn cefnogi cyflwyno Digwyddiadau Cymru – strategaeth digwyddiadau mawr gyntaf Cymru a lansiwyd ym mis Medi 2010. Nod y strategaeth yw adeiladu ar lwyddiant Prawf Cyfres y Lludw 2009 a Chwpan Ryder 2010 i ddatblygu Cymru fel cyrchfan o safon byd ar gyfer digwyddiadau mawr.

Atodiad A

Meysydd Rhaglenni Gwariant – prif feysydd gwariant

Twristiaeth

Mae’r Rhaglen Wariant hon yn cefnogi’r gwaith o ddatblygu, hyrwyddo a marchnata Cymru fel cyrchfan i dwristiaid yn y DU a thramor.

Mae’r rhaglen farchnata’n ceisio meithrin enw da Cymru fel cyrchfan dwristiaeth yn y tymor canolig, gan ysgogi’r galw am fusnesau twristiaeth Cymru yn y tymor byr.

Er mwyn sicrhau’r elw gorau posibl o fuddsoddi’r cronfeydd sydd ar gael, mae Croeso Cymru yn dadansoddi’r farchnad ac yn nodi’r marchnadoedd blaenoriaeth a’r meysydd sydd â’r potensial mwyaf i Gymru. Drwy wneud hynny mae angen cymharu’r angen i ddatblygu marchnadoedd a meysydd sydd â photensial twf yn y tymor hwy â’r angen i barhau i lywio busnes y marchnadoedd mwy aeddfed yn y tymor byr.

Canlyniad y dadansoddiad hwn yw Cynllun Gweithredu Marchnata Strategol sy’n llywio’r camau gweithredu blaenoriaeth blynyddol. Caiff effaith y gweithgareddau marchnata hyn ei gwerthuso drwy gyfres o 7 dangosydd perfformiad allweddol. Bydd y Panel Sector Twristiaeth yn cytuno ar symud blaenoriaethau yn eu blaen.

Mae Croeso Cymru yn defnyddio technegau marchnata sy’n cynnig ymateb cyfannol ac integredig i’r her fusnes. Mae hyn yn cynnwys sicrhau’r manteision gorau posibl o’r digwyddiadau mawr sy’n cael eu cefnogi a phwyslais cynyddol ar dechnegau marchnata digidol. Mae’n cefnogi ac yn annog dull gweithredu Cymru gyfan ar gyfer datblygu twristiaeth, gyda’r sector cyhoeddus a’r sector preifat, a gweithio’n agos gyda’r pedair Partneriaeth Twristiaeth Ranbarthol.

Digwyddiadau Mawr

Dyma fydd y blaenoriaethau strategol dros y cyfnod:

- cefnogi rhaglen o Ddigwyddiadau Twf y tu allan i Gaerdydd;

- gweithio’n strategol gyda pherchnogion a threfnwyr Digwyddiadau Unigryw Cymru i ddod o hyd i ffyrdd newydd ac arloesol o’u hymestyn;

- ceisio denu digwyddiadau rhyngwladol mawr a fydd yn gwella cydnabyddiaeth ac enw da Cymru yn rhyngwladol;

- ar y cyd â’r Cynghorau Sgiliau Sector priodol, cydlynu cynllun gweithredu gyda’r sector addysg a darparwyr hyfforddiant i gryfhau adnoddau rheoli a chynhyrchu digwyddiadau proffesiynol Cymru.

Caiff y gyllideb digwyddiadau mawr eu defnyddio i gyflawni ymrwymiadau penodol y Rhaglen Lywodraethu er mwyn gweithio gyda ffederasiynau chwaraeon cenedlaethol, y DU a rhyngwladol i sicrhau bod Cymru’n cynnal mwy o ddigwyddiadau mawr yn y dyfodol a chefnogi gwaith gyda Chyngor Caerdydd i ymchwilio i ymarferoldeb gwneud cais i gynnal Gemau’r Gymanwlad yn 2026.